ବରୀ (ରତ୍ନଗିରି ନ୍ୟୁଜ) : ବରୀ ବ୍ଲକ ଅନ୍ତଗର୍ତ ପୂରାତନ ମହାବିଦ୍ୟାଳୟ ଗୋପବନ୍ଧୁ ଚୌଧୁରୀ ମହାବିଦ୍ୟାଳୟର ନୂତନ ଅଧ୍ୟକ୍ଷ ଭାବେ ନିଯୁକ୍ତି ପାଇଛନ୍ତି ପ୍ରଫେସର ପ୍ରବୋଧ କୁମାର ସାମଲ ଯୋଗଦେଇଛନ୍ତି l ଶ୍ରୀ ସାମଲ ଗତ ୩୧ ତାରିଖ ଦିନ ପୂର୍ବତନ ଅଧ୍ୟକ୍ଷଙ୍କ ଠାରୁ ଦାୟିତ୍ୱ ଗ୍ରହଣ କରିଥିଲେ । ଆଜି ପ୍ରଥମ କରି ସେ ନିଜ କାର୍ଯ୍ୟରେ ଯୋଗଦାନ କରିଛନ୍ତି । ଆଜି ସେ କାର୍ଯ୍ୟାଳୟରେ ପହଂଚିବା ପରେ କଲେଜର ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ମାନେ ତାଙ୍କୁ ପୁଷ୍ପ ଗୁଚ୍ଛ ଦେଇ ସ୍ୱାଗତ କରିଥିଲେ । ନିଜର ପ୍ରଥମ କାର୍ଯ୍ୟ ଦିବସରେ ଯୋଗଦେଇ ସେ ସମସ୍ତଙ୍କ ସହଯୋଗ କାମନା କରିଥିଲେ । ସେ କହିଛନ୍ତି ପ୍ରାତଃ ସ୍ମରଣୀୟ ମହାନ ସ୍ୱାଧୀନତା ସଂଗ୍ରାମୀ ଗୋପବନ୍ଧୁ ଚୌଧୁରୀଙ୍କ ନାମରେ ନାମିତ ଏହି ମହାବିଦ୍ୟାଳୟ କେବଳ କଲେଜର କର୍ମଚାରୀଙ୍କ ପାଇଁ ଗୌରବର ଅନୁଷ୍ଠାନ ନୁହେଁ ବରଂ ଏହା ବରୀ ଓ ଯାଜପୁର ଜିଲ୍ଲାର ମଧ୍ୟ ଏକ ପୁରାତନ ଓ ଗୌରବର ଅନୁଷ୍ଠାନ । ଏହି ଅନୁଷ୍ଠାନର ଗାରିମା ରକ୍ଷା କରି ମହାବିଦ୍ୟାଳୟରେ ଶୈକ୍ଷିକ ବାତାବରଣ ବୃଦ୍ଧି କରିବାକୁ ପ୍ରାଥମିକତା ଦେବାକୁ ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି । ଏହା ସହିତ କର୍ମଚାରୀ, ବୁଦ୍ଧିଜୀବିଙ୍କ ସହିତ ବର୍ତ୍ତମାନର ଓ ପୁରାତନ ଛାତ୍ରଛାତ୍ରୀ ଏହି ଅନୁଷ୍ଠାନର ଗୌରବ ବଢାଇବାରେ ସହଯୋଗ କରିବାକୁ ସେ ନିବେଦନ କରିଛନ୍ତି ।
