ନବରଙ୍ଗପୁର(ରତ୍ନଗିରି ନ୍ୟୁଜ) : ସବୁ କଳ୍ପନାର ଅନ୍ତ ଘଟିବ, ବିଧିବଦ୍ଧ ଭାବେ ବିଜେଡିରେ ଆଜି ସାମିଲ ହେବେ ପ୍ରଦୀପ ମାଝି । ଶ୍ରୀ ମାଝୀଙ୍କୁ ଦଳରେ ସାମିଲ କରାଇ ସ୍ୱାଗତ କରିବା ପାଇଁ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାଶ , କ୍ରୀଡା ଏବଂ ଯୁବ ସେବା ମନ୍ତ୍ରୀ ତୁଷାରକାନ୍ତି ବେହେରା, ବିଧାୟକ ଚନ୍ଦ୍ର ସାରଥି ବେହେରା, ନବରଙ୍ଗପୁର ସାଂସଦ ରମେଶ ଚନ୍ଦ୍ର ମାଝୀ ପ୍ରମୁଖ ଉପସ୍ଥିତ ରହିବେ ବୋଲି ଜଣାପଡିଛି l ଏଥି ଲାଗି ନବରଙ୍ଗପୁର ସହରରେ ବିଜେଡି ପକ୍ଷରୁ ଜୋରଦାର ପ୍ରସ୍ତୁତି ଶେଷ ହୋଇଛି ।
ପୂର୍ବତନ ସାଂସଦ ପ୍ରଦୀପ ମାଝୀ ବିଧିବଦ୍ଧ ଭାବେ ବିଜେଡିରେ ଯୋଗଦାନ କରିବାକୁ ନେଇ ନବରଙ୍ଗପୁର ମାଝୀଗୁଡା ପଡିଆରେ ଚାଲିଥିବା ପ୍ରସ୍ତୁତି ସରିଛି । ନିକଟ ଅତୀତରେ ପ୍ରଦୀପ କଂଗ୍ରେସରୁ ଇସ୍ତଫା ଦେଇଥିବା ବେଳେ ତାଙ୍କ ସହ କଂଗ୍ରେସରୁ ଇସ୍ତଫା ଦେଇଥିବା ନିଜର ହଜାର ହଜାର ସମର୍ଥକଙ୍କ ସହିତ ବିଜେଡିରେ ଯୋଗଦାନ କରିବା ନେଇ ପ୍ରଦୀପ ଘୋଷଣା କରିଥିଲେ । ପ୍ରଦୀପ ଓ ତାଙ୍କ ସମର୍ଥକ ମାନେ ନବରଙ୍ଗପୁର ସହର ଚାଉଁରିଆଗୁଡା ଛକ ଠାରୁ ଏକ ଶୋଭାଯାତ୍ରାରେ ନବରଙ୍ଗପୁର ସହର ପରିକ୍ରମା କରି ମାଝୀଗୁଡା ଠାରେ ପହଞ୍ଚିବା ପରେ ମିଶ୍ରଣ ପର୍ବ ସଭା ସ୍ଥଳକୁ ଯିବେ।
ଏହି କାର୍ଯ୍ୟକ୍ରମରେ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାଶ , କ୍ରୀଡା ଏବଂ ଯୁବ ସେବା ମନ୍ତ୍ରୀ ତୁଷାରକାନ୍ତି ବେହେରା, ବିଧାୟକ ଚନ୍ଦ୍ର ସାରଥି ବେହେରା, ନବରଙ୍ଗପୁର ସାଂସଦ ରମେଶ ଚନ୍ଦ୍ର ମାଝୀ, ସ୍ଥାନୀୟ ବିଧାୟକ ଓ ବିଜେଡିର ରାଜ୍ୟ ସ୍ତରୀୟ କିଛି ନେତାଙ୍କ ଉପସ୍ଥିତ ରେ ମିଶ୍ରଣ ପର୍ବ ହେଉଥିବା ସୂଚନା ମିଳିଛି । ଏହି ମିଶ୍ରଣ ପର୍ବରେ ପ୍ରଦୀପ ଓ ତାଙ୍କ ସମର୍ଥକ ବିଜେଡିରେ ସାମିଲ ହେବା ନେଇ ବିଧିବଦ୍ଧ ଭାବେ ଘୋଷଣା କରିବେ। ଏହା ବିଜେଡିର ସାଂଗଠନିକ କାର୍ଯ୍ୟକ୍ରମ ହେଉଥିବା ଯୋଗୁଁ ବିଜେଡିର ୪ଟି ନିର୍ବାଚନ ମଣ୍ଡଳୀର ୧୦ ହଜାରରୁ ଅଧିକ ବିଜେଡି କର୍ମୀ ଏହି କାର୍ଯ୍ୟକ୍ରମରେ ଯୋଗ ଦେବେ ବୋଲି ସୂଚନା ମିଳିଛି। ତେବେ ପ୍ରଦୀପଙ୍କ ସହ ଅନ୍ୟ କେଉଁ କେଉଁ ଅନୁଗତ କର୍ମୀ ବିଜେଡିରେ ଯୋଗଦାନ କରିବେ ସେନେଇ କିଛି କହିନାହାନ୍ତି ପ୍ରଦୀପ ।
