ଆଠମଲ୍ଲିକ (ରତ୍ନଗିରି ନ୍ୟୁଜ) :‘ବଡ଼ ଖବର’ର ଆଠମଲ୍ଲିକ ପ୍ରତିନିଧି ପ୍ରଦୀପ ଘିଓ୍ବାଲାଙ୍କ କୋଭିଡରେ ଦେହାନ୍ତ ହେବା ନେଇ ଖବର ଆସିବା ପରେ ବିଭିନ୍ନ ମହଲରେ ଗଭୀର ଶୋକ ପ୍ରକାଶ ପାଇଛି l ସ୍ଵର୍ଗତ ଘିଓ୍ବାଲାଙ୍କ ବିୟୋଗରେ ବରିଷ୍ଠ ସାମ୍ବାଦିକ ତଥା ‘ବଡ ଖବର’ର ସମ୍ପାଦକ ଅର୍ଦ୍ଧେନ୍ଦୁ ଦାସ ଟୁଇଟ କରି ଶୋକ ପ୍ରକାଶ କରିବା ସହ ସ୍ୱର୍ଗତଃ ଘିଓ୍ବାଲାଙ୍କ ଭଳି ଜଣେ ଦକ୍ଷ, ପ୍ରତିଭାବାନ ସାମ୍ବାଦିକ ଖୁବ୍ ବିରଳ । ଜଣେ ସାମ୍ବାଦିକ ଭାବେ ନିଜ ଜିଲ୍ଲାର ଇତିହାସ, ଭୂଗୋଳ, ସାମାଜିକ, ଅର୍ଥନୀତି, ସଂସ୍କୃତି ସଂପର୍କରେ ସେ ଯେଉଁ ଭଳି ଜ୍ଞାନ ରଖୁଥିଲେ, ନିଜର କର୍ମ ଓ କର୍ମକ୍ଷେତ୍ରକୁ ଭଲ ପାଉଥିଲେ, ତାହା ବାସ୍ତବିକ ପ୍ରେରଣାଦାୟୀ । ସେ ସବୁବେଳେ ସାଧାରଣ ଲୋକଙ୍କ ସ୍ବାର୍ଥ ସମ୍ବଳିତ ଖବରରେ ନିଜକୁ ସମର୍ପିତ ରଖିଥିଲେ । ତାଙ୍କର ଅକାଳ ବିୟୋଗ ରାଜ୍ୟର ସାମ୍ବାଦିକ ଜଗତ, ଅନୁଗୁଳ ଜିଲ୍ଲା, ‘ବଡ଼ ଖବର’ ପରିବାର, ବିଶେଷକରି ବ୍ୟକ୍ତିଗତ ଭାବେ ତାଙ୍କ ପାଇଁ ଅପୂରଣୀୟ କ୍ଷତି ଘଟିଲା କହିବା ସହ ଶ୍ରୀ ଦାସ ପ୍ରଦୀପଙ୍କୁ ଗଭୀର ଶ୍ରଦ୍ଧାଞ୍ଜଳି ଜଣାଇବା ସହ ତାଙ୍କ ଅମର ଆତ୍ମାର ସଦଗତି କରିଛନ୍ତି ।
