ଭୁବନେଶ୍ୱର (ରତ୍ନଗିରି ନ୍ୟୁଜ) ୨୫/୦୩: ପ୍ରତିବର୍ଷ ପରି ଏ ବର୍ଷ ତପସ୍ୟା ଫାଉଣ୍ଡେସନ ର ସାହିତ୍ୟ ପୁରସ୍କାର କାଲି ରାତିରେ ସ୍ଥିର ହୋଇଛି I ଅବଶ୍ୟ ଏ ବର୍ଷ ଟିକେ କରୋନା ଆଉ କିଛି ଜୁରୀଙ୍କର ବ୍ୟକ୍ତିଗତ ଅସୁସ୍ଥତା କାରଣରୁ ପୁରସ୍କାର ଘୋଷଣାରେ ବିଳମ୍ବ ହେଇଛି I ଏ ବର୍ଷ ‘ତପସ୍ୟା ଶାଶ୍ୱତ ପୁରସ୍କାର’ ଗ୍ରହଣ କରିବେ ବିଶିଷ୍ଟ ସାହିତ୍ୟିକ ଶ୍ରୀ ଅଚ୍ୟୁତାନନ୍ଦ ପତି I ସେହିପରି ତପସ୍ୟା ସୃଜନ ପୁରସ୍କାର ପାଇବେ ଡା. ରଞ୍ଜନ ପ୍ରଧାନ I ତାଙ୍କର ଦୁଇଟି ବହି ‘ଗୋନାଶିକା ନନ୍ଦିନୀ ବୈତରଣୀ’ ଏବଂ ‘ବୁଢ଼ାବଳଙ୍ଗର ମାଝୀ’ ପୁସ୍ତକ ପାଇଁ ଏହି ପୁରସ୍କାର ଦିଆଯାଉଛି I ଓଡିଶାର ନଦୀ ମାନଙ୍କ ଉପରେ ତାଙ୍କର ସ୍ୱତନ୍ତ୍ର ଆଲେଖ୍ୟ ପାଇଁ ବିଚାରକ ମଂଡଳି ଏହି ପୁସ୍ତକ ଦୁଇଟିକୁ ଚୟନ କରିଛନ୍ତି I ଶ୍ରୀମାନ ପରମବୀର ଚକ୍ର ଏ ବର୍ଷ ‘ତପସ୍ୟା ସମ୍ଭାବନା ପୁରସ୍କାର’ ପାଇବେ I କବିତା କ୍ଷେତ୍ରରେ ନୂତନ ପରୀକ୍ଷା ନିରୀକ୍ଷା ପାଇଁ ତାଙ୍କୁ ଏହି ପୁରସ୍କାର ପାଇଁ ଚୟନ କରାଯଇଛି I
ଏପ୍ରିଲ ଶେଷ ଆଡକୁ ମାନପତ୍ର, ଅଙ୍ଗବସ୍ତ୍ର ଓ ଯଥାକ୍ରମେ 50,000, 30,000 ଓ 20,000 ଟଙ୍କାର ଅର୍ଥ ରାଶି ସହ ଏଇ ସମ୍ମାନ ପ୍ରଦାନ କରାଯିବବୋଲି ଅନୁଷ୍ଠାନ ସୂତ୍ରରୁ ଜଣାପଡିଛି l
