ଯାଜପୁର:ଗତ କାଲି ସନ୍ଧ୍ୟାରେ ୧୬ ନମ୍ବର ଜାତୀୟ ରାଜପଥରେ ଟ୍ରଲର ଓ ବାଇକ ମଧ୍ୟରେ ଦୁର୍ଘଟଣା ହେବାରୁ ଯାଜପୁର ସଦର ଥାନା ଅନ୍ତର୍ଗତ ମହେଶ୍ୱରପୁର ପଞ୍ଚାୟତ ବେଣିପୁର ଗ୍ରାମର ବାସୁ ସାମଲଙ୍କ ପୁଅ ନିର୍ମଳ ସାମଲ (୩୫)ଙ୍କର ଶୋଚନୀୟ ମୃତ୍ୟୁ ହୋଇଛି । ନିର୍ମଳ ଚଣ୍ଡିଖୋଲରୁ ନିଜ ସମ୍ପର୍କୀୟ ପୁତୁରାକୁ ସାଙ୍ଗରେ ନେଇ ଏକ ମଟର ସାଇକେଲ ଯୋଗେ ନିଜ ଘର ବେଣିପୁର ଫେରୁଥିବା ସମୟରେ ଏହି ଦୁର୍ଘଟଣା ହୋଇଥିଲା । ଚାଳକ ନିର୍ମଳଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିବା ବେଳେ ପଛରେ ବସିଥିବା ସମ୍ପର୍କୀୟ ପୁତୁରା ଗୁରୁତର ହେବାରୁ ତାଙ୍କୁ ପ୍ରଥମେ ଧର୍ମଶାଳା ଡାକ୍ତରଖାନାକୁ ଚିକିତ୍ସା ପାଇଁ ନିଆ ଯାଇଥିଲା । ସେଠାରେ ଅବସ୍ଥା ଗୁରୁତର ହେବାରୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି।ଘଟଣା ସ୍ଥଳରେ ଧର୍ମଶାଳା ପୋଲିସ ପହଞ୍ଚି ଶବ ଜବତ କରି ଧର୍ମଶାଳା ମେଡ଼ିକାଲରେ ରଖିଥିବା ଜଣାପଡିଛି।ଏହି ଘଟଣା ପ୍ରଚାରିତ ହେବା ପରେ ଆଖ ପାଖ ଅଞ୍ଚଳରେ ଶୋକର ଛାୟା ଖେଳି ଯାଇଛି। ମୃତ ନିର୍ମଳ ଜଣେ ପରୋପକାରୀ ଯୁବକ ଭାବେ ବେଶ ପରିଚିତ ଥିଲେ ।
