ବରୀ,୦୫/୧୧(ରତ୍ନଗିରି ନ୍ୟୁଜ) : ବଚସାକୁ କେନ୍ଦ୍ର କରି ଛୁରାରେ ଆକ୍ରମଣ ଘଟଣାରେ ଜଣେ ଆହତ ହୋଇ କଟକରେ ଚିକିତ୍ସିତ ହେଉଥିବାବେଳେ ଏହି ଘଟଣାରେ ଅଭିଯୁକ୍ତକୁ ଗିରଫ କରି ବରୀ ପୋଲିସ ମଙ୍ଗଳବାର ଦିନ କୋର୍ଟ ଚାଲଣ କରିଥିବା ଜଣାପଡିଛି । ଗତ ସୋମବାର ଅପରାହ୍ନରେ ବରୀ ରାମଚନ୍ଦ୍ରପୁର ଥାନା ଅନ୍ତର୍ଗତ ବାଲିବିଲ ସାଇ ମନ୍ଦିର ନିକଟରେ ବାଲିବିଲ ଗ୍ରାମରେ ଜ୍ଞାନରଂଜନ ସ୍ୱାଇଁ(ବୁଲୁ)ଙ୍କ ସହ ରମ୍ପା ପଞ୍ଚାୟତ ନେଉଳା ଗ୍ରାମର ନକୁଳ ମହାନ୍ତିଙ୍କ ପୁଅ ଶକ୍ତିଶେଖର ମହାନ୍ତିଙ୍କ ସହିତ କୌଣସି କାରଣରୁ ବଚସା ହୋଇଥିଲା। ଏହା ଏପରି ଉଗ୍ରରୂପ ନେଇଥିଲା ଯେ ଅଭିଯୁକ୍ତ ମହାନ୍ତି ଏକ ଧାରୁଆ ଛୁରୀ ସାହାଯ୍ୟରେ ରକ୍ତାକ୍ତ ଆକ୍ରମଣ କରିଥିଲେ। ଏଥିରେ ବୁଲୁ ଗୁରୁତର ଆହତ ହୋଇଥିଲେ ବି ଆକ୍ରମଣକାରୀ ଶକ୍ତିଶେଖରଙ୍କୁ କାବୁ କରି ନେଇଥିଲେ। ପରେ ଅନ୍ୟ ଲୋକମାନେ ଉପସ୍ଥିତ ହୋଇଯିବା ସହ ବରୀ ପୋଲିସକୁ ଘଟଣା ସମ୍ପର୍କରେ ସୂଚନା ଦେଇଥିଲେ। ଖବର ପାଇ ବରୀ ପୋଲିସ ସଦଳବଳେ ଘଟଣା ସ୍ଥଳରେ ପହଞ୍ଚି ଅଭିଯୁକ୍ତ ଶକ୍ତିଶେଖରକୁ ଗିରଫ କରି ଥାନାକୁ ଆଣିଥିଲେ। ଗୁରୁତର ଆହତ ହୋଇଥିବା ବୁଲୁଙ୍କ ପତ୍ନୀ ଲକ୍ଷ୍ମୀପ୍ରିୟା ସ୍ୱାଇଁଙ୍କ ଲିଖିତ ଅଭିଯୋଗ ଆଧାରରେ ବରୀ ପୋଲିସ ଥାନା କେଶ୍ ନଂ୫୦3/୨୩ ଦଫା ୩୦୬, ୩୦୭, ୩୨୩, ୩୨୪ ଓ ୩୪୧ରେ ମାମଲା ରୁଜୁ ସହ ଅଭିଯୁକ୍ତକୁ ମଙ୍ଗଳବାର ଦିନ କୋର୍ଟଚାଲଣ କରିଛି। ଅନ୍ୟ ପକ୍ଷରେ ଆହତ ବୁଲୁଙ୍କୁ ପ୍ରଥମେ ବରୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରେ ଯାଜପୁର ଜିଲ୍ଲା ମୁଖ୍ୟଚିକିତ୍ସାଳୟକୁ ନିଆଯାଇଥିଲା। ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି ବୋଲି ଜଣାପଡିଛି।
